Мөнәжәттәр

     Мөнәжәттәр. Халыҡ ижадынан

     

       Рамаҙан айҙары йәмле

 

   Бисмилләһир-рахмәнир-рахим.

   Был көн мөьэминдәргә шатлыҡ,

   Уларҙың йөҙөндә аҡлыҡ;

   Рамаҙан айы килгәндә —

   Торалыр нурҙары балҡып.

                          Был көн һөйөндөрә Аллаһ.

                          Ике шатлыҡ ҡылып вәғәҙә:

                          Береһе — ауыҙ асып, икенсеһе

                          Хоҙурына юлыҡҡанда.

   Был көн мөьэмин мосолмандар

   Йыйылғандар тәрәуихҡа;

   Зекер, тәсбих әйтеүселәр

   Оҡшағандар мәләктәргә.

                         Йә, Раббым, ярлыҡа беҙҙе

                         Дәхи ата-әсәбеҙҙе;

                         Йәннәт менән бәхетле ҡыл

                         Әхирәт дуҫтарыбыҙҙы.

   Шөкөр ҡылһаҡ Аллаһыға,

   Ирештерер Рамаҙанға;

   Рамаҙан ураҙаһын тотоп,

   Әҗер сауаптар алып.

                        Ихлас менән ураҙа тотайыҡ,

                        Уның сауабы бик күптер;

                        Ураҙа тотҡан бәндәләргә

                        Хоҙайҙың рәхмәте күптер.

   Ураҙа тотҡан бәндәләрҙең

   Ғәмәлдәре ауыр килер;

   Ауыр килгән ғәмәлдәрен

   Ҡыйәмәт көн ҡулына алыр.

                        Донъяла ураҙа шатлығы —

                        Ауыҙ асыу менән сәхәр;

                        Ҡыйәмәттәге шатлығы

                        Барса хәтәрҙәрҙән һаҡлар.

   Ҡәҙер кисәләре етәр,

   Фәрештәләр ҡанат йәйәр;

   Мөьэмин булған барса бәндә

   Сауап эҫтәп башын эйәр.

                        Рамаҙан айҙары йәмле,

                        Уның ғәйеттәре етәр;

                        Ауырыуҙар был айҙарҙа

                        Хәйер-доға өмөт итәр.

   Ялбарабыҙ һиңа, Раббым,

   Һалмасы беҙҙе тарлыҡҡа;

   Рамаҙандың хөрмәтенә

   Гонаһыбыҙҙы ярлыҡа.

                       Намаҙ уҡыйыҡ, ураҙа тотайыҡ,

                       Хоҙайым сауабын бирер;

                       Ҡыйәмәт көн ғәмәлдәребеҙ

                       Беҙгә ҡаршы килеп торыр.

   Ураҙа тотҡан бәндәләрҙең

   Ҡыйәмәттә йөҙө аҡтыр;

   Ихлас менән тотҡан булһа,

   Барса гонаһларҙан паҡтыр.

             

           Рамаҙан айы килгәндә
   

   Был көн мөьэминдәргә шатлыҡ,

   Уларҙың йөҙөндә аҡлыҡ.

   Рамаҙан айы килгәндә

   Торалыр нурҙары балҡып.
                                   Был көн рәхим-шәфҡәт менән

                                   Ике шатлыҡ ҡыла Аллаһ:

                                   Береһе ураҙа тотоуҙыр,

                                   береһе — Хоҙурына юлыҡҡанда.
   Я Раббы, ярлыҡа беҙҙе,

   Дәхи ата-әсәбеҙҙе,

   Дәхи әбей-бабайҙарыбыҙҙы

   Йәннәт менән мәшрүф ҡыл.

                                   Шөкөр ҡылабыҙ Аллаһыға,

                                   Ирештерҙе Рамаҙанға.

                                   Рамаҙан ураҙаһын тотып,

                                   Хисапһыҙ әҗер аласаҡа.

 

              Хуш килдең һин, Рамаҙан!

   

   И, ҡәрҙәштәр, һөйөнөс беҙгә

   Изге Рамаҙан ай булған;

   Был ай беҙгә иң ҙур байрам,

   Донъяға ул биргән ҙур йәм.

                     Әй, Рамаҙан; Рамаҙан,

                     Хуш килдең һин, Рамаҙан!

                                     Иман әһелен шатландырған,

                                     Тура юлға сафландырған,

                                     Күңелдәрҙе паҡландырған,

                                     Изге Рамаҙан айы булған.

                     Әй, Рамаҙан, Рамаҙан,

                     Хуш килдең һин, Рамаҙан!

   Наҙанлыҡтан ғилемлеккә,

   Татыулыҡҡа, сихәтлеккә,

   Һаранлыҡтан юмартлыҡҡа

   Өндәйһең һин, Рамаҙан!

                    Әй, Рамаҙан, Рамаҙан,

                    Хуш килдең һин, Рамаҙан!

                                     Хөрмәт итһәк күңел менән

                                     Изге Рамаҙан айыбыҙҙы;

                                     Иң ҡәҙерле ай был беҙгә,

                                     Иман нуры бирер йөҙгә.

                    Әй, Рамаҙан, Рамаҙан,

                    Хуш килдең һин, Рамаҙан!

   Изгелек ҡыл, бәхетең артыр,

   Йөҙҙә иман нуры артыр;

   Тәүбәң ҡабул була торған

   Изге Рамаҙан айы барҙыр.

                     Әй, Рамаҙан, Рамаҙан,

                     Хуш килдең һин, Рамаҙан!

                                     Был Рамаҙан айҙарында

                                     Килде Ҡәҙер кистәре;

                                     Ураҙа тотҡан бәндәләргә

                                     Иҫәр йәннәттең елдәре.

                    Әй, Рамаҙан, Рамаҙан,

                    Хуш килдең һин, Рамаҙан!

   И, Рамаҙан, ҡәҙерле ай,

   Бөйөк һинең ерҙә хаҡың;

   Ошо изге ҡәҙерле айҙа

   Азатлыҡ яулайҙыр халҡың.

                    Әй, Рамаҙан, Рамаҙан,

                    Хуш килдең һин, Рамаҙан!

 

       Рамаҙан айы хөрмәтле
   

   Рамаҙан айы хөрмәтле

   Башҡа айға ҡарағанда;

   Нимәләр алып барырбыҙ

   Мәңгелек йортҡа барғанда.

                        Рамаҙан айҙы ҙурлап

                        Ауыҙ астырһа бер кем,

                        Ҡыйәмәт көнө булғанда,

                        Дидарын күрер ул кем.

   Әй, Хоҙайым, ҡабул итсе

   Ошо ҡәҙерле ураҙамды;

   Мәңгелек йорттарға барғас,

   Еңел итсе хисабымды.

                        Ғәмәлдәрҙе ҡыла алмайым,

                        Бөтмәй бит был донья эше;

                        Фирдәүес тигән йәннәткә

                        Керер изге булған кеше.

   Әй, Хоҙайым, Бер Хоҙайым,

   Донья беҙҙән ҡаласаҡ ул;

   Яҡшылығың, яманлығың

   Үзең менән барасаҡ ул.

                       Әй, Хоҙайым, Бер Хоҙайым,

                       Ҡайҙа ҡылған ғәмәлдәрем;

                       Сәхәр тороп, намаҙ уҡыһаң,

                       Нурлы булыр ҡәберҙәрең.

   Йәннәткә тубый ағастың

   Күләгәһен насыйп әйлә;

   Ғәйбәттәрҙән телдәремде

   Рамаҙан айында бәйлә.

                       Иң ҡәҙерле ай был беҙгә,

                       Ҡәҙер-хөрмәт итәйек беҙ;

                       Ҙурлап, ҡәҙер-хөрмәт итеп

                       Салауат өмөт итәйек беҙ.

 

Был Хоҙайҙың хөрмәтле айы!

   

   Был Хоҙайҙың хөрмәтле айы,

   Хуш килдең һин, Рамаҙан!

   Барыбыҙҙы бергә йыйҙың

   Лә иләһә илләллаһ.

                          Ошо хөрмәтле айҙарҙы

                          Ҡыуанып ҡаршы алайыҡ!

                          Ризыҡтарыбыҙ киңдер —

                          Лә иләһә илләллаһ.

   Донья-әхирәт маҡсудтарын

   Теләй торған айҙыр был,

   Ғафил булып ҡалмайыҡ —

   Лә иләһә илләллаһ.

                         Көндәрендә ураҙа тотоп,

                         Кистәрендә уяу торайыҡ!

                         Гонаһларҙан тәүбә итәйек —

                         Лә иләһә илләллаһ.

   Гонаһыбыҙ күп булһа ла,

   Хаҡ Тәғәлә ярлыҡар;

   Ысын күңелдән теләйек беҙ —

   Лә иләһә илләллаһ.

                         Хаҡ Тәғәләнән теләйек беҙ

                         Ошо айҙан күп теләк!

                         Беҙ теләгәнде белер Ул —

                         Лә иләһә илләллаһ.

   Һигеҙ йәннәт ишектәре

   Ошо айҙа асылыр;

   Барыбыҙғала насыйп әйҙә —

   Лә иләһә илләллаһ.

                        Ете тамуҡ ишектәре

                        Ошо айҙа ябылыр;

                        Барыбыҙғала рәхмәт әйҙә —

                        Лә иләһә илләллаһ.

   Ете ҡат күк ишектәре

   һәммәһе асыҡ торор;

   Күп ғафилдәр аны белмәй —

   Лә иләһә илләллаһ.

                        Әй, ҡәрҙәштәр, ғафил булмайыҡ,

                        Тәүбә истигъфар ҡылайыҡ.

                        Салауаттарҙы күп әйтәйек —

                        Лә иләһә илләллаһ.

   Ысын күңелдән салауат әйтеп,

   Теләйек беҙ көнө-төнө:

   Ҡабул булһа күккә ашар —

   Лә иләһә илләллаһ.

                       Ошо айҙа салауат әйтмәй

                       Йөрөгәндәрҙе Бер Хоҙай

                       Йәһәннәмдә ғазаб ҡылыр —

                       Лә иләһә илләллаһ.

   Башланым мин һүзҙәремде

   Ул истигъфар менән,

   Гонаһларҙан тәүбә итеп —

   Лә иләһә илләллаһ.

 

                             Ай-Һай, Рамаҙан,
                                үтәһең инде
                 

                    Ай-Һай, Рамаҙан, үтәһең инде,

                    Алдағы йылды көтәрбеҙ инде.

   Килгән саҡтарында бик рәхәт ине,

   Сыҡҡан саҡтарында яманһыу ине.

                    Көндәрең йәмле, төндәрең моңлы,

                    Үтеп киткәс тә һағынырбыҙ инде.

   Ай-Һай, Рамаҙан, хәлдәр бик яман,

   Риза бул инде беҙ бисаранан.

                   Ҡәҙер кистәрең бик йәмле ине,

                   Үтеп китәһең, хуш һау бул инде.

   Ураҙа тотҡандың йөҙҙәре нурлы,

   Хоҙайым, ҡабул ҡылһан ине.

                  Үтеп китәһең, хуш һау бул инде,

                  Хуш һау бул инде, хуш һау бул инде.

   Йөҙҙәр нурлана, мөхәббәт арта,

   Үтеп киткәнгә ҡайғырам инде.

                 Ай-Һай, Рамаҙан, ни ҡылайыҡ инде,

                 Бик ҡәҙерле итеп оҙатайыҡ инде.

   Ай-Һай, Рамаҙан, үтәһең инде,

   Бигерәк яманһыу итәһең инде.

                Үтеп китәһең, хуш һау бул инде,

                Хуш һау бул инде, хуш һау бул инде.

Ошо биттәрҙә мөнәжәттәр:

https://nazir1965.com/m%D3%A9n%D3%99zh%D3%99tt%D3%99r/3203.html

https://nazir1965.com/m%D3%A9n%D3%99zh%D3%99tt%D3%99r/m%D3%A9n%D3%99zh%D3%99tt%D3%99r-k%D3%A9jl%D3%A9-m%D3%A9n%D3%99zh%D3%99tt%D3%99r.html

https://nazir1965.com/m%D3%A9n%D3%99zh%D3%99tt%D3%99r/nama%D2%99-m%D3%A9n%D3%99zh%D3%99te.html

https://nazir1965.com/category/m%D3%A9n%D3%99zh%D3%99tt%D3%99r