Аш-һыу мәжлестәрендә

              Аш-һыу мәжлестәрендә уҡыу өсөн

                  Мәжлесегеҙ күркәм булһын,

                  Өйөгөҙгә фәрештәләр тулһын.

                  Доғаларығыҙ ҡабул булһын, 

                  Әрүәхтәрегеҙ шат булһын.

                                      Килеп индем өйөгөҙгә,

                                      Доға бирҙек түрегеҙгә.

                                      Иман нуры йөҙөгөҙҙә,

                                      Нурҙар булһын ҡәберегеҙҙә.

                  Килеп индем өйөгөҙгә,

                  Тәсбих нуры йөҙөгөҙҙә.

                  Тәсбих әжерҙәрен бирһен,

                  Бер Хоҙайым үҙегеҙгә.

                                      Ошо өйҙөң хужаһына,

                                      Дәхи балаларына,

                                      Дәхи ата — әсәһенә,

                                      Шәфҡәт бирһен Рәсүлулла. 

                     Һағынып килдем үҙегеҙгә,

                  Дәхи күрҙем йөҙөгөҙҙө.

                  Беҙҙе ҡаршы алған кеүек,

                  Хурҙар ҡаршы алһын һеҙҙе.

                                      Эй, туғандар, һыйланығыҙ,

                                      Тәмле ниғмәттәр менән.

                                      Хоҙайым һыйлаһын һеҙҙе,

                                      Йәннәт ниғмәттәре менән.

                  Минең бүләгем юҡ һеҙгә,

                  Тел бүләктәрем һеҙгә.

                  Хоҙай биргән бүләгем бар,

                  Хәйер — доға ҡылам һеҙгә.

                                      Хоҙай ғүмерҙәрҙе бирһә,

                                      Тағын да бер күрешербеҙ,

                                      Иманыбыҙ ҡабул булһа,

                                      Йәннәттәрҙә күрешербеҙ.

                  Уҡы тиһәгеҙ, уҡырмын,

                  Күңелдәрегеҙ асылһын,

                  Һигеҙ йәннәт эҫтәрендә,

                  Ризыҡтарығыҙ сәселһен.

                                      Эй, дуҫтарым, беләһегеҙме,

                                      Ғүмер үтә һиҙәһегеҙме?

                                      Был ғүмерҙәр үткәндән һуң,

                                      Ниҙәр булыр, беләһегеҙме?

                  Был донъянан китәрбеҙ,

                  Әжәл һыуын эсәрбеҙ,

                  Бер ғәмәлһеҙ үләр булһаҡ,

                  Ҡиәмәттә нишләрбеҙ.

                                      Ҡунаҡ булдыҡ өйөгөҙҙә,

                                      Зекер әйттек түрегеҙҙә,

                                      Нурҙар балҡый йөҙөгөҙҙә,

                                      Яҡты булһын гүрегеҙҙә.

                   Йәнем — тәнем менән һеҙгә,

                   Доға ҡылам барығыҙға,

                   Тыныслыҡ һәм сәләмәтлек,

                   Хоҙай бирһен барығыҙға.

                                     Рәхмәт һеҙгә ҡәрҙәштәр,

                                     Мәжлес үткәреүегеҙгә.

                                     Дингә ихлас булған өсөн,

                                     Хоҙай рәхмәт ҡылһын һеҙгә. 

                   Был мәжлестең хозурлығы,

                   Тәьҫир итә күңелдәргә.

                   Теләйем һеҙгә сәләмәтлек,

                   Сәғәҙәтле ғүмерҙәрҙе.

                                    Был мәжлестең хужаһына,

                                    Ҡөрьән аяты хаҡына.

                                    Доғаларыбыҙ ҡабул булһын,

                                    Ирештерһен мораҙына. 

                   Нисә төрлө тәғәм йыйҙыҡ,

                   Был хәжанәң түрҙәрендә.

                   Ҡиәмәт көнө булғанда,

                   Нур уйнаһын йөҙҙәрендә.

                                    Нисә төрлө аш әҙерләп,

                                    Беҙҙе бында өндәне.

                                    Гонаһтарын ғәфү итеп,

                                    Йәннәтле ҡыл был бәндәне.

                   Өҫтәлдәрҙә төрлө ниғмәт,

                   Төрлөһөндә төрлө ләззәт.

                   Быларҙы әҙерләүсегә,

                   Хоҙай бирһен үҙе йәннәт.

                                    Остаздар булған мәжлестәрҙә,

                                    Була тәғәмдәре татлы. 

                                    Уларҙың йөҙҙәре нурлы,

                                    Һүҙҙәре мөхәбәтле. 

                  Был мәжлестең хозурлығы, 

                  Итә тәьҫир күңелдәргә,

                  Иләһим беҙҙе ирештер, 

                  Йәннәт фирдәүестәренә. 

                                    Был ғилемлек мәжлесе,

                                    Нәсихәттәр бирә беҙгә.

                                    Баҡый иманыбыҙ менән,

                                    Инһәк ине гүребеҙгә.

                   Мәжлестәрҙең ҡәҙерен беләйек,

                   Хоҙайға күп зекер ҡылайыҡ.

                   Дин исламда булған өсөн,

                   Шатланышып шөкөр ҡылайыҡ.

                                    Беҙҙе ҡәҙер — хөрмәт иттең,

                                    Үҙең шатлыҡтарҙа ҡалдың.

                                    Йәннәттән өлөштәр алдың,

                                    Тамуғ уты харам булһын.

                   Тәквил булһын хаятығыҙ,

                   Кәҫир (күп) булһын ғәмәлегеҙ.

                   Әжәлгә хаҡ биреп форсат,

                   Тиҙ булмаһын вафатығыҙ.

                                     Хоҙайҙың рәхмәтен татып,

                                     Ҡөръән уҡытһа, бер кемсә.

                                     Гүзәл егет һүрәтендә,

                                     Килер икән оло Ҡөрьән.

                    Хоҙай ҡәләмелер Ҡөръән,

                    Тигән беҙгә оло китап.

                    Ҡөръән менән ғәмәл ҡылһаҡ, 

                    Хоҙай ҡылыр еңел хисап.

                                     Мәхшәр ере ҡаты көндә,

                                     Сәләм бирер икән Ҡөръән.

                                     Уҡытҡан бәндәләрен,

                                     Йәннәткә алып барыр Ҡөръән.

                    Мөбәрәк булһын тағы һиңә,

                    Хәҡиҡәт серен яҙған унда.

                    6666 (алты мең алты йөҙ алтмыш алты)

                    Аяттар бар тине унда. 

 

                                       Аятөл Көрси

                             Аятөл Көрси, ҙур аят. 

                             Уны һәр кем уҡыһын. 

                             Уны уҡыған бәндәләр,

                             Ожмахҡа тура барһын.

                                             Аятөл Көрси, ҙур аят.

                                             Уҡымайса ҡалмағыҙ.

                                             Аятөл Көрси уҡыһаҡ,

                                             Тамуғтарҙа янмабыҙ.

                              Аятөл Көрси, ҙур аят,

                              Әжерен биреп яҙҙырһындар.

                              Әжерен биреп яҙҙырып,

                              Вариҫтарға ҡалдырһындар.

                                              Аятөл Көрси, уҡығыҙ,

                                              Кисен урындарға ятҡанда...

                                              Беҙгә шунда шәфҡәт килер,

                                              Тамуғтарға атҡанда.

                                Рәсүлулла миғражда,

                                Аятөл Көрси уҡыған.

                                Аятөл Көрси уҡыуҙы,

                                Өммәттәренә ҡалдырған.

                                               Рәсүлулла ғәжәпләнде,

                                               Аятөл Көрсинең сауабына.

                                               Аятөл Көрси уҡығандар,

                                               Еңел бирер яуабын да.

                                 Аятөл Көрсине, Ҡөрьәндәргә ҡушығыҙ,

                                 Сәфәр сыҡҡанда уҡығыҙ.

                                 Аҙашҡанда, һаташҡанда,

                                 Аятөл Көрси уҡығыҙ.

                                                Рәсүлулла шат булыр,

                                                Аятөл Көрси уҡыһаҡ,

                                                Ҡиәмәт көнө булғанда,

                                                Аллаһының дидарын күрһәк.

                                  Аятөл Көрси уҡыйыҡ,

                                  Мөхәммәд өммәте булһаҡ,

                                  Һөйөнөс һәм шатлыҡтар булыр,

                                  Гонаһтарыбыҙҙан пакланһаҡ.

                                                Бер мән тәһәрәт менән,

                                                Уҡыһа Аятөл Көрси.

                                                Минең пак- саф ҡолом тип,

                                                Яҙыр исемен уның Аллаһы. 

 

                                     Аллаһыға ялбарыу

               Донъянан китәсәгем, ҡәбергә керәсәгем. 

               Унда тереләсәгем, һин ярҙам бир, Иләһим.

               Мөнкир-Нөкир килгәндә, Раббың кем тип һорағанда.

               Ни хәл булыр шул саҡта, һин ярҙам бир, Иләһим.

               Ҡәберҙән ҡубасағым, мәхшәргә барасағым,

               Хисабым бирәсәгем еңел ҡылғыл, Иләһим.

               Ғәмәлемде үлсәрҙәр, һәр эшемдән һорарҙар,

               Сиратҡа ла һөрөрҙәр, еңел кисер, Иләһим.

               Йәнә быларҙан башка, пәйғәмбәрем ни әйтһә,

               Аллаһынан ни китерһә, инандым мин, Иләһим.

               Барыһын хаҡ белдем, һәммәһен ҡабул ҡылдым,

               Ысын күңелдән ышандым, һин ҡабул ҡыл, Иләһим.

 

           Мөнәжәттәр китабынан, Башҡортостан мосолмандары диниә назараты, Дәғүәт нәшриәте

Ошо биттәрҙә мөнәжәттәр уҡығыҙ:

https://nazir1965.com/category/m%D3%A9n%D3%99zh%D3%99tt%D3%99r